O martes día 19 celebramos, unha vez máis, a nosa Foliada das Letras co grupo folk Devandaina do CIFP Politécnico de Lugo, composto por profesorado deste centro. Con elas e eles tamén tocaron as nosas pandeireteiras: Antía, Lola, Candela e Raquel; e bailaron as nosas bailadoras. O acto estivo presentado por Patricia, Aldara, Carolina e Aroa de 6ºB.
As foliadas, de gran carácter participativo e comunitario, permítennos achegar e transmitir a nosa cultura a través da música, do baile, do canto, da práctica e creación musical. Cantamos e bailamos en roda, en parella…a Xota das Neves, Xota de Lourido, Valse do Miro, Xota de Taboada, Muiñeira Buxos Verdes, Pasodobre de Mallou, Xota do Canizo, Valse dos Vellos, Cuba. Rematamos cantando todas e todos xuntos o Himno Galego, preparado previamente en E. Musical e nas clases.
Gozamos e participamos moito desta Foliada das Letras!
Achegámonos ao final cunhas palabras de Begoña Caamaño, autora homenaxeada o Día das Letras Galegas 2026: “Grazas por escollerdes a loita continua, calada e mesmo desprestixiada, da diversidade cultural. Grazas a todas e todos por levardes na fronte unha estrela e no bico un cantar, en galego”
Un agradecemento moi especial ao grupo folk Devandaina do CIFP Politécnico de Lugo pola súa proximidade e xenerosidade. Ata outra!
Ningún comentario:
Publicar un comentario